٦ أنواع إيجابية للحديث مع النفس
مش عارف مين اللي قالنا واحنا صغيرين إن المجنون بيكلم نفسه،بس لما كبرنا فهمنا إن لو ده الحال،يبقي احنا مفيناش حد عاقل :)
مفيش حد فينا مش بيتكلم مع نفسه،دي حتي مش حاجه بتحصل ساعات،دي بتحصل كل يوم،بس الأحاديث بتختلف،فيه شخص بيفضل يلوم ويعاتب نفسه طول الوقت،وده اللي بيقوله عليه جلد الذات،بيهد نفسه بنفسه.
وفيه شخص تاني بيقدر يستغل الحديث ده في إنه يشجع نفسه ويحفزها بكل شكل ممكن،علي عكس التاني بيبني نفسه بنفسه.
عشان كده تعالي نتكلم عن ٦ أنواع إيجابية للحديث مع النفس:
البروفيسورة مولي أندروز (Molly Andrews) أستاذة علم النفس بتقول فيما معناه:
إن التحدث مع النفس صفة إنسانية يجب ألا تسبب القلق؛لا لمن يمارسها،ولا لمن يحيط به أو يهتم بأمره،ولكن بشرطين:
١-ألا تطغي علي بقية التصرفات،وتصبح ممارسة يومية أو دائمة
٢-ألا يتم التحدث بصوت عالي أكثر من اللازم،أو بصوت يزعج المحيطين بك.
من الآخر خلي كلامك مع نفسك من غير صوت عشان ميتطورش بعد كده لفصام في الشخصية لا قدر الله :) وإنك متكونش منعزل بالكلام مع نفسك إتكلم مع ناس تانية كمان وخليك إجتماعي لأنه ضروري لصحتك النفسية.
ممكن تنفس عن نفسك كتير بالحديث الذاتي،وتستأنس بوجودك مع نفسك،بس أهم حاجه إنه ميكونش بشكل مرضي،وغير كده ده بيخليك أذكي وممكن يغير الطريقة اللي بتفكر بيها للأحسن،وده حسب كلام عالمة النفس ليندا
سابادين (Linda Sapadin)،
واللي ذكرت بعض أنواع الحديث هقولك عليها دلوقتي:
٦ انواع للحديث مع النفس:
١-حديث الثناء (Complementary speech):
وده لما بتنجز مهمة وتقول لنفسك عاش يا وحش،انت بطل،أنا فخور جدا بيك ومبسوط بإنجازك،كمل علي كده يا بطل،وبده انت بتتولي مهمة الثناء علي نفسك،وساعتها مش بتستني الثناء ده من حد تاني أو مصدر خارجي،بتثني علي نفسك بنفسك.
٢-حديث التحفيز (Motivational speech):
لما تكلم نفسك خلال إنجاز مهمة صعبة شوية واليأس يبدأ يتسلل ليك فتحفز نفسك بكلام زي؛كمل خلاص مش فاضلك كتير،لو قدرت تخلص المهمة دي هتكون حققت إنجاز كبير جداً،متبقاش كتير وهتفرح بعدها بفرحة الإنجاز،وهكافئ نفسي بعدها بعدها بعشاء فاخر،عصير،خروجة كويسة،أو أياً كان،وساعتها بتتولي مهمة تحفيز نفسك بنفسك،ومش بتستني التحفيز من حد أو من أي مصدر خارجي،بتحفز نفسك بنفسك.
٣-حديث اتخاذ قرار (Outer-dialogue):
ممكن يتصل بيك رجل مبيعات يعرض عليك منتج بأقل من سعره العادي،فتسأل نفسك وقبل ما تأخذ القرار تقول لنفسك طب هل أنا محتاج المنتج ده؟ هل معايا اللي يكفي أشتري المنتج ده لو أنا محتاجه؟ هل القرار ده هيأثر علي حاجات تانية في حياتي،أو هياخد حق حاجه تانية أولي؟
أقدر أخفض السعر أكتر من كده؟
هنا بتمارس دور الناضج مع نفسك،تنبه عليه وتتأكد انه ماشي في الطريق السليم.
٤-حديث تهدئة الذات (Calming yourself):
عارف لما تتوتر،وتقول لنفسك هل الموضوع مستحق كل التوتر ده،هل ده هيأثر علي في السنين اللي جاية ولا مجرد وقت وهتعدي في كل الأحوال؟ اهدأ يا (اسمك) الموضوع مش مستحق كل ده،أنا من ساعة ما عرفتك وانت هادي وحكيم ايه اللي حصلك امسك نفسك كده أومال،وده هيساعدك أوقات كتير جداً تتغلب علي التوتر والقلق ويساعدك تهدأ.
٥-حديث مواساة الذات(Self-consolation):
مفيش حد فينا عاش من غير ما يجرب خسارة كبيرة،خسارة في شغل،خسارة في فرصة،خسر حد بيحبه أو اتوفي حد عزيز عليه،دي حاجه حياتنا مش بتخلي منها،يجي بقي الصوت الجميل ده عشان يواسيك ويعزيك،ويقولك أنا عارف إنه كان موقف مؤلم جداً بس اتأكد انه هيعدي،اتأكد ان الوضع مش هيفضل دايما كده وهيتحسن مع الوقت،متزعلش نفسك مفيش حاجه مستاهلة زعلك،ده انت فرحتك بالدنيا :)
٦-حديث أنت مخطئ (You are wrong):
وده لا تحطيم ولا جلد للذات،هو مجرد تنبيه ومحاسبة للنفس،عشان تتأكد إنها ماشية علي الطريق السليم،تحاسب نفسك أول بأول قبل ما تغرق وانت مش حاسس،كلنا محتاجين للصوت ده ينبهنا ويحسابنا ويفكرنا بٱيه الصح اللي المفروض نعمله،وايه الغلط اللي المفروض نبعد عنه.
انت طبيعي يا صديقي القارئ،مش مجنون ولا حاجه :) ولو الحديث مع النفس جنون هسبقك علي المستشفي وهكون أشد الناس جنوناً،أهم حاجه تتكلم مع نفسك عشان توجهها للأحسن،تبني نفسك ومتهدش،تحفز نفسك متحبطهاش،تواسيها متزودش عليها،وتتحرك بيها دايماً ناحية الأحسن :)
أسأل الله التوفيق لكم ولي في الدنيا والآخرة.
متنساش تتكلم مع نفسك كأنك بتكلم أكثر حد بتحبه :)
Ads go here
Comments