حسب اللي قاله الفيلسوف الروسي بيتر أوسبنسكي إن فيه ٦ مصادر للمشاعر السلبية,تعالي نتعرف عليهم لأننا لو قدرنا نشيل المصادر السلبية دي,ده هيضيف لحياتنا كتير من الإيجابية 

١-التبرير لنفسك:

لما بتفضل تبرر لنفسك أفعالك,ده بيخليك تريح ضميرك لفترة قصيرة ,بس بيخليك تتعب جداً علي المدي الطويل,لأن ده بيحسسك إنك إنسان ضعيف ,ظروفه هي اللي بتوجهه مش العكس,إنسان عنده حجة لكل حاجه,والحجج دي نفسها بتضعف شخصيتك,فمثلاً تسأل حد إنت ليه مش بتقرأ,يقولك أصل أنا مقدرش أقعد علي كتاب وأقرأ مليش خُلق,مع إنه ممكن يكون ماسك الموبايل طول اليوم وبيقرأ برضه بس اللي بيجي قدامه علي السوشيال ميديا,هو في علي المدي القصير ريح ضميره بالتبرير ده,بس علي المدي الطويل بقي شخص ضعيف حاسس إنه مش بيمتلك إرادة نفسه
وده مجرد مثال تقدر تطبقه علي أي موقف تاني.

٢-سوء الظن:

سوء الظن مرض,بيصيب صاحبه وبيأثر علي صحته النفسية سلبياً وعلي اللي حواليه كمان,بتلاقي الشخص ده دايماً بيتوقع الأسوء من الناس,حتي لو حد عمل فعل كويس عشانه هيفترض سوء نيته,وسوء الظن بيأدي لشك دائم في نفسه وفي اللي حواليه,ومفيش حد فينا بيحب يكون مع شخص شكاك,بتحب كده؟

طيب ليه تبقي إنت الشخص ده؟ إفترض دايماً في الناس الخير,عشان إنت اللي هتكون كسبان من ده,ولو بتفترض فيهم الشر دايماً فمش هيكون عندهم أي سبب يخليهم يعملوا الخير,لأنك في الحالتين هتتوقع السئ منهم.

٣-العيش في الماضي:

معظمنا بيدمر نفسه وأيامه اللي جاية عن طريق إنه يعيش في الماضي,يفضل يفكر في الحاجات اللي حصلت زمان وزعلته,ويندم علي الحاجات اللي حصلت أو اللي محصلتش أو اللي كانت ممكن تحصل,ويعيش في دوامة "لو" عشان كده كان قول المصطفى صلى الله عليه وسلم «إن أصابك شيء فلا تقل: لو أني فعلت كذا وكذا، ولكن قل: قدَّر الله وما شاء فعل، فإنَّ لو تفتح عمل الشيطان».

لو هتخليك تعيش في دوامة,اللي حصل حصل خلاص ومش هتقدر ترجع بالزمن عشان تغير ده,غير إن لو فيها إعتراض علي قدر الله سبحانه وتعالي,إستفيد من خبرات الماضي عشان تصنع مستقبل أحسن,من غير ما تزعل أو تندم علي اللي فاتك وتعيش في الماضي.

٤-شخصنة الأمور:

٥-تسول رضا البشر:

مفيش طريقة أسرع تدمر بيها نفسك من إنك تتسول رضا البشر في كل فعل بتعمله,وكلمة "تسول" جاءت في موضعها بشكل صحيح لأن فعلاً هو ده بيكون الحال ساعتها.

مهم جداً تفهم إنك مهما عملت مش هتنول رضا البشر كلهم,وعلي مر التاريخ مفيش شخص قدرت كل الناس تتفق عليه,ولو كانت لشخص كانت هتكون لخير المرسلين سيدنا محمد صلي الله عليه وسلم,بس ده برضه محصلش,عشان كده إعمل اللي يرضيك إنت واللي يرضي ضميرك,بطل تتسول رضا الناس في كل أفعالك لأنك مهما حاولت بكل ما فيك مش هتقدر ترضي كل الناس,وساعتها كل اللي هتعمله إنك هتخسر رضا نفسك عن نفسك,واللي هو أهم حاجه,لأنك إنت أهم شخص المفروض ترضيه.

٦-اللوم:

اللوم قريب شوية للتبرير,وبيتسبب في نفس العواقب,إنك بتكون شخص ضعيف بيرمي كل حاجه علي ظروفه ومعندهوش أي سيطرة علي حياته,ترمي بقي اللوم علي البلد,علي الناس,علي الظروف,علي أي حاجه,المهم إنك تدي لنفسك سبب ليه ده حالك,واللي بشكل بيديهي مش بيخليك تتحرك من مكانك بس بالعكس بيضعف موقفك وبيخليك عبد لظروفك,وبتنسي مع الوقت إنك ممكن تعيد تشكيل الظروف دي,وإنك تعمل اللي إنت فعلاً عايزه مهما كانت إيه هي ظروفك.

لما بترمي اللوم علي نفسك بتدور علي إيه اللي إنت ممكن تحسنه عشان تتقدم,لما بترمي اللوم علي أي عنصر خارجي,بتدي نفسك سبب ومبرر تفضل مكانك من غير أي تقدم محتمل,وبتتراجع بشكل مستمر.

وبس كده,دي كانت أهم ٦ مصادر للمشاعر السلبية وحسيت إنه من المفيد إنٍ أشاركها معاك,فيارب تكون استفدت منها,وتقدر تتخلي عن أي مصدر لتعاستك,عشان إنت تستاهل تكون سعيد :)

أسأل الله التوفيق لكم ولي في الدنيا والآخرة.

أنس شرقاوي

#مقالات بالعامية المصرية