دائماً بنقول إن الإنتكاس جزء من الرحلة, ومرحلة وارد جداً تعدي بيها, بس أهم حاجه إنك لو وقعت مش لازم تقع للآخر, ومش لازم توصل للقاع!

فيه شعور بتوصله ساعات لما تقع اللي هو إن اللي حصل حصل, وخلاص طالما وقعت يبقي أي حاجه مش مشكلة؛ كأن كان فيه سور بينك وبين العادة القذرة, وبمجرد ما انتكست افتكرت إن السور كله اتهد.

ودي مش حقيقة, الحقيقة إن فيه طوبة أواتنين وقعوا, والدور والباقي عليك؛ يا تكمل علي بقيته وتجيبوا الأرض, يا تحافظ علي اللي اتبقي منه!

بس ايه هو أصلاً السور ده؟

السور ده هو الساعات والأيام اللي انت قضيتها بدون إباحية, وطريقتك الجديدة في التعامل مع المثيرات والمغريات, وإزاي إنك بقيت أقوي في السيطرة علي نفسك, وعاداتك السلبية اللي اتخلصت منها, وعاداتك الإيجابية اللي اكتسبتها.

حافظ علي اللي اتبقي من السور بتاعك, وإفتكر إن لو طوبة وقعت ده مش معناه إنك تهد باقي السور, بالعكس لو طوبة وقعت حط مكانها اثنين ثلاثة!