تبان ناجح ولا تبقي فعلاً ناجح؟
تبان ناجح ولا تبقي فعلاً ناجح؟
هتحس إن هو سؤال غريب،وهتحس إن الإجابة البديهية هي إنِ أكون فعلاً ناجح،بس معظم الناس بتختار إنها تبان ناجحة علي إنها تكون فعلاً ناجحة
الزمن اللي إحنا فيه ده بيميل للسطحية دايماً،بتلاقي اللي بيتعلم من علي الوش عشان يبان إنه مثقف،واللي بيشتري الكتب عشان يصورها جمب القهوة ويكتب عليها جملة عميقة جداً هو نفسه مش فاهمها من عمقها،وناس تانية النجاح بالنسبة لهم مشهد وهو لابس فيه البدلة وبينزل من عربية ليموزين (Limousine) والناس حواليه بتصوره،بس دي نظرة قاصرة جداً للنجاح.
النجاح ليه صور أكتر كتير جداً من المشهد ده،وبيختلف من كل شخص للتاني،والنجاح مكون من خطوات كتير وعملية تراكمية مركبة؛يعني كونك تكون أسرة صالحة مستقرة ده نجاح،كونك تختار الشغل اللي بتحبه وتجتهد وتتميز فيه ده نجاح،كونك عندك عائلة مترابطة ومش مفككة ده نجاح،إنك بتعمل الحاجه اللي بتحبها أياً كانت ايه هي ده نجاح،النجاح مش نجاح مادي او مالي بس،لأن دي نظرة حد ضيق الأفق لأقصي حد،وانت مش ضيق الأفق فبلاش تتبني النظرة دي من حد تاني أفقه ضيق.
النجاح مش بالضرورة يكون ظاهر،ممكن أكون ناجح بس مفيش حد يعرفني أو مش مشهور بمعني أصح،لأن إنت الوحيد اللي تقدر تحط معايير النجاح لنفسك.
اختار النجاح الحقيقي مش المزيف،النجاح الشخصي المتعلق بيك انت،مش اللي الناس بتشوف إن هو نجاح،إختار اللي يرضيك إنت مش اللي يرضي اللي حواليك،وافتكر حاجتين مهمين جداً؛إن لو كل الناس شايفاك ناجح بس انت مش شايف نفسك كده تبقي بالفعل مش ناجح،وإنك لو ناجح بمعايير غيرك للنجاح برضه متكونش ناجح،عشان كده إختار إنك تكون ناجح،مش إنك تبان ناجح :)
أسأل الله التوفيق لكم ولي في الدنيا والآخرة.
اوعي تبقي ناجح من علي الوش بس،خليك متأصل النجاح :)
أنس شرقاوي
خطر علي بالي
#مقالات بالعامية المصرية
Ads go here
Comments