أفكار مغلوطة لما بنتكلم عن الشغف
فيه دايماً أفكار مغلوطة بتتقالك بشكل مباشر أو غير مباشر لما بنتكلم عن الشغف,مفيش شك في إن الشغف أساس النجاح,ومفيش حد قبل كده عمل نجاح عظيم من غير ما يكون شغوف بالحاجه اللي هو بيعملها,بس فيه كام نقطة لازم تاخد بالك منها
أول غلطة هي إنك تفتكر إن الشغف ده حاجه بتتولد بيها, الكلام ده مش صحيح بكل المقاييس,ممكن تكون حالة بس عمرها ما كانت قاعدة, لانك عمرك ما هتعرف إنت شغوف بالحاجه دي ولا لأ غير لما تتعلم وتجرب, علي سبيل المثال أنا بحب جداً الكتابة وعندي شغف كبير ليها,بس بدأت أكتب بالصدفة مذكراتي بعد حدث مؤلم في حياتي,ولما فضلت كده لمدة سنتين قلت لنفسي ليه ميكونش ده الكارير بتاعي؟ طالما إن دي حاجه أنا بحبها جايز كمان أحب إنِ أكتب للناس مش بس لنفسي,وده اللي حصل
تاني غلطة إنك تفتكر إن شغفك لوحده كفاية,ودي علي قد ما هي حاجه بديهية بس ناس كتير بتقع فيها,وكمثال أكيد شغفي للكورة ميخلنيش لعيب كورة ناجح طالما أنا مش بتمرن؟ بديهي كفاية صح؟
نفس الكلام بالنسبة لأي مجال وأي تخصص,لازم تتعلم وتعرف إزاي تكون متميز فالمجال ده,وبكل تأكيد شغفك هيساعدك في ده.
ثالث حاجه هي إن في دراسة في جامعة ييل أثبتوا إن الناس اللي بتحب شغلها جداً هي اللي عندها خبرات كبيرة فيه,ودي لو فكرت فيها هتلاقيها برضه بديهية,لأن إتقانك لشغل وإحساسك بإنك فاهم كل كبيرة وصغيرة فيه ممتع جداً,بيخليك مسيطر علي شغلك ومجالك وبيرفع جداً من ثقتك في نفسك وروحك المعنوية,عشان شغلك هو كيانك,وكونك متميز في شغلك معناه حاجات حلوة كتير.
الشغف بيساعدك تتعلم ودور أكتر وتبقي مهتم تعرف,وبيخلي مجالك هواية وشغل في نفس الوقت فمش بتحس إنك تحت ضغط أو بتعمل حاجه بس عشان هي مطلوبة منك,بالعكس بتكون دايماً عايز تبدع وتتألق,عشان كده متستسلمش إنك تدور علي شغفك,وتلاقيه,وتتميز في مجال شغفك,وتتألق :)
متنساش 3 حاجات
١- إن الشغف ده انت مش بتتولد بيه
٢-انك بمجرد حبك للشي ده مش هتبقي شاطر فيه بدون ما تبذل مجهود
٣- الدراسة اللي لقوا فيها ان الناس اللي بتحب جدا شغلها هي الناس اللي عندها خبرة كبيرة فيه
وأسأل الله التوفيق لكم ولي في الدنيا والآخرة.
اوعي تتألق وتنسانا صديقي القارئ أزعل منك.
#مقالات بالعامية المصرية
Ads go here
Comments